blodskam

I norsk samanheng var forbodet mot seksuell omgang mellom personar i slekt ein del av kristenretten frå mellomalderen. I Frostatingslova finn ein mellom anna reglar om at dersom ein mann har samleie med syster, mor eller dotter, skulle begge vere fredlause.

I Christian 5.s Norske lov frå 1687 vart det stilt opp dødsstraff for samleie med nokon i forbodne ledd. I tilfella der omgangen var mellom far og dotter eller mellom mor og son, eller der same person hadde hatt omgang med både mor og dotter eller far og son, skulle begge halshoggast og lika brennast.

Ved kriminallova frå 1842 vart dødsstraffa for blodskam avskaffa. Samstundes vart også straffa for dei involverte i nokre tilfelle differensiert: Samleie («utukt») med personar i rett nedstigande linje (barn, barnebarn) skulle straffast med straffarbeid i første eller andre grad, tilsvarande ni til femten år, medan samleie med personar i rett oppstigande linje (foreldre, besteforeldre) skulle straffast med straffarbeid i femte grad, tilsvarande seks månader til eitt år. Framleis var det ikkje berre samleie med personar i nær biologisk familie som var forbode, men også omgang med ei rekke personar i ste- og svigerfamilie.

I straffelova frå 1902 vert blodskam i definert å vere samleie med nokon i rett opp- eller nedstigande linje, eller med bror eller syster. Dei forbodne ledda vart redusert, men det var til dømes framleis straffbart å ha samleie med nokon ein var i svogerskap med i rett opp- eller nedstigande linje.

Ved revisjon av seksualrettskapittelet 1963 vart termen «blodskam» tatt ut av den norske straffelova. Sidan då har seksuell omgang mellom familiemedlemmar i juridisk samanheng blitt omtala som incest.

• incest
• seksuallovbrudd
• seksuell omgang