hageert

Hageert er ei plante i erteslekta. Hageert har kvite blomar som sit to saman i bladhjørna, og grøne eller gule frø.

Det finst fleire varietetar og ei mengd sortar (kultivarar):

• Pillerter har runde frø. Dei kan haustast når frøa er utvaksne, men framleis grøne og søte, men står for det meste til full modning (gule erter).
• Mergerter har meir rynkete og søtare frø enn pillerter. Dei blir dyrka som konservesert (til hermetisering). Heile planten blir hausta før frøa er modne. Belgene (skolmene) har hos begge seig innerhinne som ikkje kan brukast.
• Sukkererter har runde frø og belger utan innerhinne, og som ung kan heile belgen med dei søte frøa brukast. Dei kan etast ferske, kokte, steikte eller stua. Det finst to hovudtypar sukkererter: sukkererter med flate belger, som blir mest dyrka i Noreg, og brytsukkererter med rundt tverrsnitt
• Mergsukkererter er ei kryssing mellom sukker- og mergerter og har søte frø og hinnefrie belger.
• Brytsukkererter og brytmergerter har tjukk, kjøtfull belgvegg.