Jan Mayen
Jan Mayen is e Noors vulkoanisch eiland in de Nôordelyke Yszêe zoender permanente bevolkinge. 't Is 55 km lank (zuudwest-nôordoost) en 373 km² grôot, gedêeltelk bedekt deur gletsjers (e gebied van 114,2 km² roend de Beerenberg-vulkoan). De vegetoasje bestoat uut simpele toendraplantn.
't Eiland bestoat uut twêe dêeln: 't grottere nôordôostn Nord-Jan en 't kleindere Sør-Jan, verboendn deur e landengte van 2,5 km brêed. 't Ligt 600 km ten nôordôostn van Ysland, 500 km ten ôostn van centroal Groenland en 900 km ten nôordwestn van Vesterålen, 'n eilandngroep in 't uterste nôordn van de provinsje Nordland in 't nôordn van Nôorweegn. 't Eiland is bergachtig, met den hoogstn top de Beerenberg-vulkoan in 't nôordn. De landengte is de locoasje van de twêe grotste meern van 't eiland, Sørlaguna (zudelyke lagune) en Nordlaguna (nôordelyke lagune). 'n Derde meer noemt Ullerenglaguna.
't Eiland wordt beweund deur personêel van e navigoasjestation (Loran-C = Long Range Navigation) en van e weerstation. Der stoan ênigte huttn van weetnschappers die der ênigte weekn of moandn achterêen verbluuvn.
't Eiland Jan Mayen is vernoemd noa de 17e-êeuwsche Nederlandsche zêevoarder Jan Jacobszoon May van Schellinkhout.
|
Ofbeeldiengn die ier by passn ku je vien in de categorie Jan Mayen van Wikimedia Commons. |