Fortaleza do Castro
 | Este artigo contén varias ligazóns externas e/ou bibliografía ao fin da páxina, mais poucas ou ningunha referencia no corpo do texto. Por favor, mellora o artigo introducindo notas ao pé, citando as fontes. Podes ver exemplos de como se fai nestes artigos. |
| Fortaleza do Castro | |
|---|---|
| ben de interese cultural | |
 | |
| Concello | Vigo |
| Provincia | Provincia de Pontevedra |
| Comunidade autónoma | Galicia |
| Coordenadas | 42°13′56″N 8°43′39″O / 42.23219444, -8.72743889 |
| Estilo arquitectónico | |
| Estilo orixinal | renacemento (século XVII) |
| Estilo actual | Renacemento Neoclásico (século XVII século XVIII) |
| Estado actual | xardín-miradoiro |
| Véxase tamén | |
| Castelos de Galicia | |
| [ editar datos en Wikidata ] | |
A fortaleza do Castro é un forte ergueito no alto do monte do Castro, na cidade de Vigo. A fortaleza actual data do século XVII, e formaba parte, xunto co Castelo de San Sebastián e as desaparecidas murallas da cidade, dunha rede estratéxica de fortificacións para a defensa da cidade.
Historia
[editar | editar a fonte]A fortaleza do Castro estaba formada por tres recintos amurallados. Na actualidade só se conserva o primeiro recinto e parte do segundo; o terceiro, que sería a muralla da cidade, desapareceu na súa totalidade. O primeiro recinto é a fortaleza que coroa o cumio do Castro.
O proxecto de fortificar Vigo remóntanse ao século XVI, por mor dos frecuentes ataques que sufría a cidade, especialmente por parte dos ingleses. Pero non foi até 1665, en plena guerra con Portugal, cando se iniciaron os traballos de fortificación. É, pois, da mesma época que a fortaleza de San Lourenzo, situada en Goián, na beira do Miño.
A muralla construída é irregular por mor á orografía aberta por varias portas e defendida por tres baluartes. Tras o asedio de 1665, o capitán xeneral de Galicia ordena completar as obras, e foi logo, en 1666 cando o coronel e enxeñeiro Fernando de Gourannanbergue e mailo mestre de campo Diego Arias Taboada elaboran un intenso plan de fortificación e unión das fortalezas do Castro e de San Sebastián. A xulgar polos escritos da época a cidade nunca quedou ben defendida, pois a fortaleza se encontraba relativamente lonxe do mar e non podía deter os desembarcos. Ademais era doado acadar o cumio sen que o inimigo estivese descuberto. Logo de tres anos rematou a guerra con Portugal e as murallas perderon a súa importancia.
Despois de varios intentos de as mellorar, Vigo sofre a sonada batalla de Rande (23-24 de outubro de 1702) en plena guerra de sucesión, onde os invasores desembarcaron e saquearon novamente a vila. Despois disto houbo varios intentos inútiles de fortificación da vila.
En 1719 sufre o ataque dos ingleses.[1][2]
En 1809, a fortaleza do Castro volve ser protagonista debido á invasión dos franceses do exército de Napoleón Bonaparte, onde o 28 de marzo, a fortaleza é reconquistada polos vigueses tras unha dura e heroica batalla, trala cal os franceses se renden. A vila dende entón pasa a ter o título de "Fiel, Leal e Valorosa".
Características
[editar | editar a fonte]A fortaleza ten forma poligonal e está construída en fábrica de perpiaño de granito. Hoxe en día atópase aberta ao público, integrada no parque do Castro e completamente axardinada tanto exterior coma interiormente. Dentro atopamos unha ruta botánica con especies exóticas de interese, varias esculturas, un cruceiro, e na parte alta o miradoiro á ría e un xardín formal coa fonte e a escultura en honra ao “Empuxe Vigués" de 1969, obra de Camilo Nogueira Martínez.
A fortaleza atópase baixo a protección de Declaración xenérica do Decreto do 22 de abril de 1949, e a Lei 16/1985 sobre o Patrimonio Histórico Español.
A finais de 2013 por orde do Concello de Vigo iníciase o derrubamento do edificio en pedra ameado que fora a localización do restaurante de referencia vigués El Castillo. Co derrubamento descubrirase parte do paramento da muralla agochado parte do século XX.[3]
Galería de imaxes
[editar | editar a fonte]-
Muralla do segundo recinto. -
Porta norte, do primeiro recinto. -
Escultura de Camilo Nogueira Martínez. -
Aos 136 homes asasinados neste lugar polo franquismo.
Notas
[editar | editar a fonte]Véxase tamén
[editar | editar a fonte] |
Wikimedia Commons ten máis contidos multimedia na categoría: Fortaleza do Castro  |
Bibliografía
[editar | editar a fonte]- Álvarez Blázquez, X. M. (2008) [1960]. (A cidade e os días. Calendario histórico de Vigo) [La ciudad y los días. Calendario histórico de Vigo] (en galego e castelán). Ed. e trad.: Manuel Bragado e X. P. Sánchez. Vigo: (Xerais) Monterrey. p. 436. ISBN 978-84-9782-716-4.
- Bouza-Brey, Fermín (1945). "Diario del sitio del Castro de Vigo por los ingleses en 1719". Cuadernos de Estudios Gallegos, Vol. III, pp. 471-474.
- Garrido, Jaime (1994). Vigo. La ciudad que se perdió, arquitectura desaparecida, arquitectura no realizada (en castelán) (3ª ed.). Deputación de Pontevedra. pp. 161–166. ISBN 84-86845-92-0.
- Garrido, Jaime (27/10/2010). "El castillo de Nuestra Señora del Castro de Vigo". Faro de Vigo (en castelán).
- Santiago y Gómez, José de (1896). Historia de Vigo y su comarca. Imprenta y litografía del asilo de huérfanos, Madrid (en castelán).
- Villegas y Piñateli, Manuel (1724). Relación del sitio del puerto de Vigo ejecutado por los ingleses, el año de 1719 (manuscrito).
