krekling

Krekling er ei lita buske med små, smale og tjukke blad. Blada er grøne heile året. Buska blir mellom 5 og 30 centimeter høg.

Krekling blomstrar tidleg om våren, gjerne før snøen har forsvunne. Blomane er rødlege og veldig små. I august til september er fruktene modne. Dei er runde blå-svarte steinfrukter. Dei smakar bittert. Fruktene kan plukkast til langt ut på vinteren. Dei smakar litt søtare, etter at det har vore frost.

Krekling veks i heile Noreg. Han er mest vanleg på myr, høgt i fjellet, på mark med lyng og i skog med gran og furu. Krekling finst også i Europa, Asia og i Nord-Amerika.

Blada, og nokre gonger fruktene, er viktig mat for ryper om vinteren.

Mange plukkar fruktene for å lage vin, saft og likør.

• planter
• skog
• bær