Blomane til or sit i lange klasar. Hannblomane heng ned fremst i biletet. Oppe til venstre er dei mindre hoblomane.
Or er ein type tre med blad. Or er lauvtre. Det finst to artar or i Noreg. Svartor er vanleg i varme område ved kysten i Sør-Noreg. Gråor er vanleg innanfor kysten og nordover i landet.
Or blir pollinert av vind, som spreier pollen frå eit tre til eit anna. Trea lagar mykje pollen allereie frå februar. Mange menneske er allergiske mot pollen frå or.
Oretre har grå bork. Store svartortre har mørk, nesten svart, bork med sprekkar nedst. Gråor har ofte grå bork utan sprekkar. Namna på artane kjem av fargen på borken.
Blada er eggforma. Kantane på blada er taggete som ei sag. Blada har tydelege nervar som går frå stilken i midten av bladet og ut mot sidene, helt til kanten. Ein kan sjå dei som lysegrøne streker i bladet. Blada til gråor er spisse i enden. Blada til svartor går ofte litt innover i enden.
Blomane er veldig små og sit mange saman på rekkje. Samlingane av blomar blir kalla raklar. Kvart tre har både hannblomar og hoblomar. Raklane med hannblomar heng under kvistene slik at pollenet lett blir spreidd med vinden. Raklane med hoblomar er mykje mindre og heng ikkje ned. Slik unngår treet at pollen frå eigne hannblomar landar på eigne hoblomar.
Etter befruktning blir horaklane til runde frukter. Fruktene blir kalla orekongler, men er annleis enn kongler som gran og furu har. Orekonglene er fyrst grøne. Dei modne orekonglene er svarte og sprekk opp.
Inni orekonglene finst frøa. Desse frøa har eit tørt skal rundt seg og er difor nøtter. Nøttene veg lite og har to flate venger på kvar side av frøet. Dei lette frøa kan blåse langt av garde med vinden. Slik spreier ora seg til nye område.
Or har vore mykje brukt til ved. Or gjev ikkje like mykje varme som bjørk. Trea veks fort og difor var veden lett å få tak i.
Blada til dei fleste lauvtrea blir gule, oransje og raude om hausten. Det er fordi trea må spare på viktige stoff til fotosyntesen. Hos or er det ikkje slik, ortrea har grøne blad heilt til dei fell av. Det er fordi or får dei viktige stoffa frå bakteriar i røtene.
Treet og bakteriane samarbeider slik at bakteriane får ein stad å leve og treet får nitrogen frå bakteriane. Blada til or inneheld dermed mykje næring. Når blada fell på bakken og blir brote ned til jord, blir jorda ekstra næringsrik. Slik får dei andre plantene i oreskogen også hjelp av bakteriane.
