Kroepdeers

Ne slange is n vuurbeeld van n kroepdeer

Kroepdeers, ook wal reptielen neumd (Reptilia), zeent kooldblodige deers met butte. Iej veendt ze oawer de hele waerld, mer neet in koolde gebeden, zo as op de polen en baargtöppe. Dat gef nog zo 9500 soorten kroepdeers. Wiedters heb iej nog völle soorten kroepdeers dee as oetstörven zeent. Vake zeent dee allene as fossiel bekaend. Der laewden lange leden onmeundige grote soorten, zo as de Mosasaurus, den in zee woonden en woervan as der ook n fossiel in Nederlaand veunden is. Ne aandere belangrieke oetstörvene groep warren de Pterosauriërs. Dee konden vlegen en behaersden dat lochtroem. Toch zeent der gin laewende soorten maer van. Der is groot oonderskaeid tusken de roeme groep kroepdeers (alle bekaende soorten) en de smalle groep (de soorten dee as der rechtevoort nog zeent).

Kroepdeers wordt vake samen eneumd met amfibieën, mer dee hebt niks met mekoar gemeen. Amfibieën hebt ne duurloatende hoed en gin skubben. Kroepdeers hebt dit wal. Dat grötste oonderskaeid is nog wal det kroepdeers nooit as larven laewt, terwiel as dat amfibieën gef, dee as det wal doot.

Kroepdeers wordt meesttieds op de volgende wieze indeeld.

• Skubde kroepdeers (Squamata) (slangen, aewerdasken, hazelwörme en wormaewerdasken)
• Brugaewerdasken(Sphenodontidae)
• Skeeldpädde (Testudines)
• Krokodillen (Crocodilia)

Dit artikel is eskreaven in et twentske dialekt van West-Twaente, in de Algemene Nedersaksiese Schriefwieze.