Bergljot Kaslegard

Bergljot Kaslegard er fødd i Ål i Hallingdal. Ho er utdanna ved Norsk barnebokinstitutts forfattarlinje og har ein mastergrad i litteraturformidling frå Universitetet i Oslo.

I 2009 debuterte Kaslegard som forfattar med romanen Magda, under namnet Bergljot K. Nordal. Etter den tid har ho gitt ut fleire romanar: Ruts bok (2012), Det ingen har fortalt deg (2013), Bare la meg være i fred (ungdomsroman, 2016), Det som nesten er sant (2017) og Elvira har klikka (2025). Dessutan gav ho ut diktsingelen Slik på Flamme Forlag i 2014. I tillegg til skrivinga arbeider Kaslegard som pianolærar.

I tre av vaksenromanane har Kaslegard skrive om eldre menneske, og ho skriv seg inn i sjangeren «personleg minnelitteratur». Dei tre bøkene heng lausleg saman, fordi dei alle handlar om Magda og mannen hennar, Bodvar, og venninna Rut. I den første boka er Magda hovudperson, medan Rut er den sentrale i Ruts bok. I Det som nesten er sant følgjer vi tankane til halvt demente Bodvar, som framleis slit med minnet om faren som forsvann for familien då Bodvar var ung. I alle tre bøkene viser Kaslegard stor evne til å leve seg inn i tankeverda til eldre menneske.

Dei tre første bøkene skreiv Kaslegard på nynorsk, medan ho seinare har brukt bokmål.

Kaslegard fekk tildelt Buskerud Mållags målpris i 2010 og fekk Tanums kvinnestipend i 2014.

• Elvira har klikka (Roman, Tiden, 2025)
• Det som er nesten sant (Roman, Tiden, 2017)
• Bare la meg være i fred (Ungdomsbok, Aschehoug, 2016)
• Slik (Lyrikk, Flamme, 2014)
• Det ingen har fortalt deg (Roman, Tiden, 2014)
• Ruths bok (Roman, Tiden, 2012)
• Magda (Roman, Tiden, 2009)

• Noregs litteraturhistorie
• roman
• lyrikk
• nynorsk
• bokmål

• Tiden Norsk Forlag si forfattarside om Bergljot Kaslegard
• Aschehoug si forfattarside om Bergljot Kaslegard
• Flamme Forlag si forfattarside om Bergljot Kaslegard