Ingrid Fiskaa er ein norsk politikar for Sosialistisk Venstreparti som sidan 2021 representerer Rogaland på Stortinget. Ho har tidlegare vore leiar av Sosialistisk Ungdom og statssekretær i Utanriksdepartementet. Ho er i perioden 2021–2025 Stortingets femte visepresident.
Ingrid Fiskaa
Faktaboks
Ingrid Fiskaa
- Fødd
- 16. april 1977, Ringerike, Buskerud
Bakgrunn
Ingrid Fiskaa er fødd på Ringerike og oppvaksen på Bryne i Time i Rogaland. Ho er utdanna lektor med mastergrad i historie frå Universitetet i Oslo i 2009. Mastergradsoppgåva skreiv ho om Lofthuus-opprøret. I tillegg til historie har ho òg litteraturvitskap, norsk og praktisk pedagogikk i fagkrinsen.
Politisk karriere
Fiskaa var organisasjonssekretær i Sosialistisk Ungdom (SU) frå 1999 til 2002 og leiar i organisasjonen frå 2002 til 2004. Ho har òg vore medlem av sentralstyret i Sosialistisk Venstreparti (SV) frå 2003. Fiskaa har vore leiar av Rogaland SV sidan 2018. Ho har vore medlem av Time kommunestyre sidan 2019.
Frå 1997 til 2005 og i perioden 2009–2013 var ho første vararepresentant for Rogaland på Stortinget. I 2007 kjempa ho mot Bård Vegar Solhjell om å verte ny nestleiar i partiet, men tapte med knapp margin.
Frå hausten 2009 til mars 2012 var Fiskaa statssekretær for utviklingssaker i Utanriksdepartementet, under utviklingsminister Erik Solheim. Etter det byrja ho å arbeide som lærar ved Hellerud videregående skole i Oslo. Fiskaa vart innvald som stortingsrepresentant for SV frå Rogaland i 2021.
Anna engasjement
Fiskaa var leiar for Fredsinitiativet i 2005, ein organisasjon som vart skipa i 2003 i protest mot krigen i Irak. I 2004 vart ho styremedlem i Attac Noreg. Ho er òg engasjert i målsaka og var styremedlem i Noregs Mållag i 2013–2018.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.