Norid er verksemda som administrerer og forvaltar det norske toppnivådomenet .no. Norid driftar den sentrale databasen over alle registrerte .no-domener og er ansvarleg for at domenetenestene fungerer stabilt og sikkert.
Norid er eit aksjeselskap som er heileigd av Digitaliserings- og forvaltningsdepartementet.
.no vart registrert som nasjonalt toppnivådomene for Noreg av amerikanaren Jon Postel 17. mars 1987. Toppnivådomenet vart opphavleg delegert til Televerkets forskingsinstitutt, assistert av internettpionerane Pål Spilling og Jens Thomassen. Ansvaret vart overført til Uninett same år. Namnet Norid stammar frå 1996, og er eit akronym for norsk registreringsteneste for internett domenenamn. I 2003 vart Norid skild ut som eit eige aksjeselskap, men framleis eigd av Uninett. I 2021 vart eigarskapen overført til Kommunal- og moderniseringsdepartementet.
I 1997 fekk Norid òg ansvar for toppnivådomena .sj (Svalbard og Jan Mayen) og .bv (Bouvetøya). Desse domena er ikkje i bruk.
Talet på domenenamn har auka raskt. I 1989 var det 19 domenenamn under .no. I 1995 passerte ein 1000 domenenamn, i 2000 var det 50 000 domenenamn, og i 2020 var det 800 000.
For å registrere eit domenenamn under .no må søkjaren oppfylle visse krav, mellom anna å vere ei juridisk eining registrert i Noreg eller ein privatperson med norsk fødselsnummer eller d-nummer. Norid samarbeider med registreringsleverandørar (registrarar) som handterer domeneregistreringar på vegner av kundane sine.
Det fyrste regelverket for domeneregistrering under .no (namnepolitikken) vart offentleggjord i 1995. Regelverket var opphavleg svært restriktivt. Berre organisasjonar (bedrifter og andre verksemder) kunne registrere domenenamn, og dei kunne registrere berre eitt domenenamn som dei måtte dokumentere rettar til.
Seinare har reglane blitt forenkla og liberaliserte. I 2000 vart det til dømes opna for å registrere generelle ord og uttrykk, og året etter vart kravet om å dokumentere rettar til namnet fjerna. Grensa for talet på domene per organisasjon vart auka til 15 i 2001, og til 100 i 2011. I 2004 vart tillatne teikn utvida med mellom anna æøå og samiske bokstavar som čđŋšŧž. I 2014 vart det tillate for privatpersonar å registrere domenenamn direkte under .no, fram til dette måtte privatpersonar bruke domene under .priv.no.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.