blankmispel

Blankmispel er ein busk som vert om lag 2 meter høg. Busken har heile, mørkegrøne blad som vert mellom 2–7 centimeter lange. Blomane har kvite til bleikraude kronblad og sit 3–15 saman i klasar. Fruktene som vert danna er svarte bæreple. Desse vert spreidde av fuglar.

Blankmispel kjem opphavleg frå grenseområdet mellom Sør-Sibir og Mongolia. I Noreg vart busken innført som hageplante frå slutten av 1800-talet, og har sidan forvilla seg i alle fylka her. Planta er hardfør og toler temperaturar ned til -25°C. Ho finst i mange ulike naturtypar: frå opne til skuggefulle stader, i skog, skogkantar, kratt, i attgrodd eng og beitemark, i rasmark, på berg og i skrentar, og også i vegkantar og i skrotemark.

Blankmispel er innført til Noreg som hageplante og vert mellom anna nytta som hekkplante.

Blankmispel vert spreidd til naturen frå hagar og grøntanlegg og fortrenger heimlege artar. Særskilt utgjer blankmispel ein stor risiko for fortrenging av trua og sårbare artar i baserik skog, på bakkar og berg.

• Fremmedartslista
• mispelslekta
• rosefamilien

• Økologisk risikovurdering av blankmispel i Artsdatabanken