Vestland

Vestland fylkeskommune styrer lokale oppgåver som vidaregåande skular, kollektivtransport og kultur.

Fylkeshuset ligg i Bergen. Fylkesordføraren er den øvste folkevalde leiaren for fylkeskommunen. Høgre blei det største politiske partiet i Vestland under kommunestyre- og fylkestingsvalget i 2023.

Haukeland universitetssjukehus i Bergen er det største sjukehuset i fylket. Sjukehuset samarbeider med Universitetet i Bergen om forsking og undervisning i medisin.

Mange menneske i fylket arbeider med helse, utdanning, industri, turisme, fiskeri og olje. I Nordsjøen er det fleire olje- og gassfelt utanfor kysten av Vestland.

Dei siste tiåra har fylket blitt eit viktig område for oljeindustrien i Noreg. Det er òg fleire hundre tusen turistar som kjem til fylket kvart år.

Fylket har rundt 12 prosent av Noregs befolkning. Nær halvparten bur i Bergen. Om lag 80 prosent bur i byar og tettstader.

Litt over halvparten av elevane i grunnskulen har bokmål som hovudspråk, medan resten har nynorsk. Der er mange vidaregåande skular og fleire folkehøgskular i fylket. I Bergen er det universitet og høgskular.

Hardangervidda, Jotunheimen og fjordane ved kysten er populære reisemål for turistar.

Vestland har kyst mot Nordsjøen i sør og vest. Ved kysten er det mange fjordar, fleire av dei er verna. Sognefjorden, som er Noregs lengste fjord, ligg i fylket. Nærøyfjorden er eit verna område som er mykje besøkt av turistar.

Det er òg fleire fjellområde, skog, isbrear, innsjøar, elver og fossar i fylket. Det er fem nasjonalparkar i fylket. Her lever mellom anna rev, rein, hjort og elg. I havet utanfor kysten finst det fleire kvalartar og mange ulike fiskeartar. I kystområda kan ein òg sjå sel.

Fylket har eit variert klima med milde vintrar og somrar i kystområda. I periodar regnar det mykje i desse områda. I fjella kjem det ofte mykje snø om vinteren. Det er mange vasskraftverk i fylket.

Vestland fylke vart grunnlagd 1. januar 2020 etter at fylka Hordaland og Sogn og Fjordane vart slått saman. Namnet Vestland kjem frå namnet på heile landsdelen, Vestlandet.

Fylkesvåpenet viser eit skjold med eit naturlandskap i blått og sølv. Det er to sølvfarga fjell med blå fjordar.

• fylke
• fylkeskommune
• Vestlandet
• kommune
• Nordsjøen