Horda Tidend
I meir enn tretti etterkrigsår, frå 1949 til 1981, var Johs. K. Ringheim (bilete) redaktør i Horda Tidend. Ringheim var ein ihuga sauebonde, såg til sin eigen smale og heldt gjennom spaltene i Horda Tidendeit vedvarande fokus på sauehaldet. Han gav sauehaldet ein profil, og her fanst ein god grunn for mange til å halde bladet. Småbrukaren og bladstyrarenvar også ein stor humorist og lokalhistorisk engasjert. Den leiande avisa på Voss var berre ei todagarsavis like til 1977, og det gav opning for nr. 2-avisa til Johs K. Ringheim. Aleine i redaksjonen drog han distriktet si nr. to-avis, og var ein skarpt teikna bladstyrar, meiningssterk og uredd.
Historie
Horda Tidend kom ut under namnet Vossingen 1. september 1925, men skifta namn i april 1929. Avisa gjekk over frå gotisk til latinsk skrift i 1928. Både Vossingen og Horda Tidend vart redigerte på nynorsk og kom ut to dagar i veka.
Frå skipinga av partiet i 1920 jobba Bondepartiet intenst med å få aviser opp og gå på Vestlandet. På Voss hadde Bondebladet vore partiavis sidan 1914, men blei flytta til Bergen i 1922 for å bli ei meir vidfemnande avis. Bladet Vossingen blei difor ny partiavis for Voss i 1925. Horda Tidend blei i 1929 bondeorganet for Voss og Hardanger, slik Firda Tidend vart i Sogn og Fjordane. Bladet skulle likevel by på rom for politiske synspunkt som låg utanfor Bondepartiet.
Avisa stoppa under andre verdskrigen
Okkupasjonsmakta under andre verdskrigen stoppa utgivinga i august 1941, og det første nummer etter krigen kom ikkje før 22. april 1949. Frå 1949 til 1981 redigerte den meiningssterke sauebonden Johannes K. Ringheim (1918–1991) avisa, og i redaktørtida hans var avisa særleg eit talerøyr for sauehald. For å vere oppdatert på den politiske situasjonen i landet generelt og på Senterparti-politikk spesielt, tok avisa imot stoff frå sjølve bindeleddet mellom avisene og partiet: Bondepartiets Pressekontor som vart skipa i 1948. Ved sida av at avisa Hordaland kom ut med berre to nummer i veka, var det sterke fokuset på sauehald ein grunn til at Horda Tidend greidde seg så lenge som nr. 2-avis.
Fem redaktørar prøvde i perioden 1981–1989 å berge avisa frå å verte lagd ned. Mellom anna sa avisa seg politisk uavhengig, fekk nye eigarar, i tillegg til å gå over frå fullformat til halvformat, og endra utforming. Opplaget steig, men Horda Tidend vart likevel lagt ned etter ei styrt avvikling 6. januar 1989.
Utmerkingar
I 1983 fekk avisa Voss næringssamskipnad sin pris for opplagsauke og ny giv.
Opplag
| År | Opplag |
|---|---|
| 1932 | 1000 |
| 1950 | 1700 |
| 1960 | 1700 |
| 1972 | 1955 |
| 1983 | 1797 |
| 1987 | 2413 |
Fakta
- Vossingen: fyrste nummer 1. september 1925, siste nummer 27. mars 1929.
- Skifta namn til Horda Tidend 3. april 1929 og kom ut fram til 9. august 1941.
- Fyrste nummer etter krigen 22. april 1949, siste nummer 6. januar 1989.
Les meir i Store norske leksikon
Litteratur
- Eggum, Terje (2010): «Horda Tidend», i Idar Flo (red.): Norsk presses historie 1660–2010: Norske aviser fra A til Å, bind 4. Oslo.
- Grepstad, Ottar (2010): Avisene som utvida Noreg: Nynorskpressa 1850–2010. Oslo.
- Hjeltnes, Guri (red.) (2010): Norsk presses historie 1660–2010: Imperiet vakler 1945–2010, bind. 3. Oslo.
- Ottosen, Rune (red.) (2010): Norsk presses historie 1660–2010: Presse, parti og publikum 1880–1945, bind 2. Oslo.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.