Magnus Dagestad, treskjerar og skulestyrar. Han arbeidde for ein norsk riksstil, som han kalla det, ein brukskunst og ein prydkunst som bygde på det beste i den norske folkekunsten frå mellomalderen. I tillegg til verkstad i Bergen og på Voss dreiv han Norsk kunsthandverksskule på Voss.
Magnus Dagestad
Faktaboks
Magnus Dagestad
- Fødd
- 13. august 1865, Voss
- Død
- 2. april 1957, Voss
- Verke
- Treskjerar og skulestyrar
- Familie
-
Foreldre: Skreddar Mads Magnesson Liland (1838–70) og Marta Villumsdotter Dagestad (1846–1931).
Gift 1) 1888 med Helena Bu (1867–1947), dotter til lærar og dekorasjonsmålar Olav Ottoson Haukanes (1830–93) og Torbjørg Arnfinnsdotter Trones, ekteskapet oppløyst 1920; 2) 1928/30 med Ragnhild; 3) 1934 med Brita Mølster (15.9.1905–3.7.1981), dotter til gardbrukar Botolv Mølster (1873–1947) og Anna Olsdotter (1865–1947).
Foto 1893. Bilete frå Norsk biografisk leksikon
Læretid og etablering
Magnus Dagestad byrja i lære hos treskjeraren Lars Kinsarvik som 18-åring. Der laga han i hovudsak turistartiklar. Seinare videreutdanna han seg ved Bergens tekniske skole. I Bergen dreiv Dagestad etter kvart verkstad med ein kompanjong. Saman laga dei arbeid for møbelsnikkar Christopher Knag og til Christian Michelsen sin bustad, Gamlehaugen.
I perioden rundt hundreårsskiftet 1900 deltok Dagestad på fleire utstillingar i inn- og utland. På Landsutstillingen i Bergen i 1898 fekk han bronsemedalje for eit kråskap som vart innkjøpt av Vestlandske Kunstindustrimuseum.
Samarbeid med kona Helena
På lik linje med Lars Kinsarvik byrja òg Dagestad å måle møblane sine. I 1900 utdanna kona Helena Dagestad seg til brukskunstnar, og ho måla alle møblane hans etter det. Frå byrjinga av 1900-talet var alle måla møblar ei felles verksemd mellom Magnus og Helena Dagestad.
Lærargjerning
Magnus Dagestad var òg lærar. I tida frå 1905 til 1912 var han styrar for Vestlandske Kunstindustrimuseums Snedker- og Træskjærerskole, som vart starta i verkstaden hans på Voss. I åra 1921–1935 var han styrar ved Norsk kunsthandverksskule på Voss.
Magnus Dagestad verka òg som teiknar, målar, forfattar og spelemann.
Les meir i Store norske leksikon
Litteratur
- Lærum, O. D. (1989): Magnus Dagestad : treskjerar, spelemann og livskunstnar. Oslo: Samlaget
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.